وجه محمد محمد رشوان، محامي اللاعب أحمد رفعت، جناح الفريق الأول لكرة القدم بنادي مودرن سبورت، رسالة مهمة عقب وفاة اللاعب اليوم السبت.
وجاء في رسالة رشوان، التي نشرها عبر حسابه الشخصي على موقع التواصل الاجتماعي "فيسبوك": "يا جماعة الخير يا أهل المسلمين.. أحمد رفعت بين أيادى الله. ادعوله بالرحمة والمغفرة بدل النبش وإيه اللي حصل وإيه اللي وصل."
وأضاف رشوان: "وأشوف واحد كاتب هقدم بلاغ ضد هيثم عرابي وواحد كاتب مش عارف مسؤولين نادى إيه وصفحات ومواقع وجرايد اتقوا الله يا جماعة.. الراجل الله يرحمه ائتمنا على أسراره.. ومستحيل كده."
وتابع رشوان: "الموضوع حصل أيام احتراف أحمد في الإمارات وأزمة وانتهت، وأثرت عليه شوية وعملتله مشكلة لما جه يحترف تاني لأنه كان لاعب كبير وعنده عروض كتير. الدكتور وليد دعبس والكابتن هيثم عرابي هما أصلا اللي حلوا الأزمة دى.. أنا بتكلم كمحامي اللاعب عليه رحمه الله."
واختتم رشوان رسالته قائلاً: "الله يرحمك يا أحمد ويغفرلك ويسامحك ويسكنك فسيح جناته."